Hos 4 | NdeIBE | STEP | Zwanini ilizwi likaJehova, lina bako-Israyeli ngoba kulecala uJehova alethesa lina elihlala elizweni: “Akulakwethembeka, akulathando, akukho ukumamukela uNkulunkulu elizweni.

Hosea 4

Icala eletheswa u-Israyeli

1 Zwanini ilizwi likaJehova, lina bako-Israyeli ngoba kulecala uJehova alethesa lina elihlala elizweni: “Akulakwethembeka, akulathando, akukho ukumamukela uNkulunkulu elizweni.

2 “Kulokuthuka kuphela, lokuqamba amanga lokubulala, lokuntshontsha kanye lobufebe; benza ububi bonke, njalo ukuchithwa kwegazi kulandela ukuchithwa kwegazi.

3 Ilizwe liyalila ngenxa yalokhu, njalo bonke abahlala kulo bayacikizeka; izinyamazana zeganga lezinyoni zasemoyeni kanye lezinhlanzi zaselwandle kuyafa.

4 “Kodwa akungabi lamuntu omangalayo, akungabi lomuntu owethesa omunye icala ngoba abantu bakho bafana lalabo abamangalela umphristi.

5 Liyakhubeka emini lebusuku, labaphrofethi bakhubeka kanye lani. Ngakho unyoko ngizamchitha –

6 abantu bami bachithwa yikungabi lolwazi. “Njengoba likwalile ukwazi, lami ngiyalala njengabaphristi bami; ngoba kaliwunakanga umthetho kaNkulunkulu wenu, lami angiyikubanaka abantwana benu.

7 Ngokwanda kwabaphristi, kwanda kanjalo lokona kwabo kimi, benanisa uDumo lwabo ngento elihlazo.

8 Badla izono zabantu bami bajabuliswe yikuxhwala kwabo.

9 Njalo kuzakuba kanje: Njengabantu, njengabaphristi. Bonke ngizabajezisela izindlela zabo ngiphindisele kubo lezenzo zabo.

10 “Bazakudla kodwa bangasuthi; bazakwenza ubuwule kodwa bangandi, ngoba bamdelile uJehova ukuba bazinikele 11 ebuwuleni, lewayini elidala kanye lelitsha elisusa ukuqedisisa 12 kwabantu bami. Badinga izeluleko esithombeni sesigodo baphendulwe yiluthi lwesigodo. Umoya wobuwule uyabedukisa; kabathembekanga kuNkulunkulu wabo.

13 Banikela imihlatshelo ezingqongweni zezintaba batshise iminikelo phezu kwamaqaqa, ngaphansi kom-okhi, lomphophila kanye lomtherebhinti, lapho okulomthunzi omnandi. Ngakho amadodakazi enu enza ubuwule, labomalokazana benu benze ubufebe.

14 “Angiyikuwajezisa amadodakazi enu lapho esenza ubuwule loba omalokazana benu lapho besenza ubufebe, ngoba amadoda uqobo azwana lamawule anikele imihlatshelo lamawule asezindaweni zokukhonzela – abantu abangelakuqedisisa bazabhubha.

15 “Lanxa ufeba, we Israyeli, uJuda kangabi lecala. “Lingayi eGiligali; lingayi eBhethi Aveni. Njalo lingafungi lisithi, ‘Ngeqiniso elinjengoba uJehova ekhona!’

16 Abako-Israyeli bayiziqholo, njengethokazi eliyisiqholo. Pho uJehova angabelusela njani emadlelweni njengezimvu na?

17 U-Efrayimi uhlangene lezithombe; myekeleni enjalo!

18 Lalapho okunathwayo kwabo sekuphelile, bayaqhubeka ngobuwule babo; ababusi babo bazithanda kakhulu izindlela ezilihlazo.

19 Isivunguzane sizabakhukhula, lemihlatshelo yabo izabalethela ihlazo.